గౌరవనీయులైన ఈనాడు ఎడిటర్ గారికి,
నమస్కారములతో పరదేశం నుంచి ఓ సదురు తెలుగు వాడు వ్రాయునది. మీ వెబ్ సైటునకు చాలా పాప్యులారిటి ఉంది. ఎక్కువమంది మీ సైటుని దర్శిస్తూ ఉంటారు. అలాంటి మీరు అందరికీ మార్గ దర్శకులుగా ఉండాల్సింది పోయి మీరే తెలుగులోని శ్రేష్టమైన పదాలకి తెగులు పట్టించేస్తే.. తెలుగు భాషపైన మమకారం కలిగిన ఓ తెలుగు అభిమానిగా ఉండపట్టలేక మీకు ఉత్తరం వ్రాస్తున్నాను.
నిజ్జంగా మీరు తెలుగు వారేనా అని నాకు ఓ అనుమానం.. లేదా పరాయి రాష్ట్రం నుంచి వలస వచ్చి ఉద్యోగాలు చేస్తున్న సెంట్రల్ గవర్నమెంట్ ఉద్యోగులలాగా మీరు పరాయి భాష వారా!! లేక మీరు ఒఠి పేరుకు మాత్రమే ఎడిటర్ గారా అని నాకు చాలా అనుమానం.
ఇంకా ఎక్కువ వ్రాస్తే మిమ్ములను ధూషిస్తానేమో అని నాకు ఓ మూల శంకగా ఉంది. అసలు విషయాన్ని ఒక్క ముక్కలో వివరిస్తాను. ఇవ్వాల్టి ఆన్ లైన్ పేపర్లో, “వూరికో అద్దె” అంటూ ఓ ఆర్టికల్ వ్రాసారు. ఇలా చక్కగా ఉండాల్సిన “ఊరు” అనే పదం మీలాంటి వాళ్ళ వల్ల బ్రష్టు పట్టి వంకరై “వూరు” గా మారి దాని అసలు రూపాన్ని పోగొట్టుకుంటోంది.
భాషకు మీలాంటి వాళ్ళు ఎంత తెగులు పట్టించేస్తున్నారో ఒక్క సారి ఆలోచించండి. దయచేసి మీలాంటి వాళ్ళవల్ల కలిగే నష్టం ఎంత ఉందో గమనించండి. వూరు అనేపదం సరిఅయినది కాదు ఊరు అనేదే అసలు పదం అని ప్రక్కనున్న మరో తెలుగు వానికి చెబితే, ఈనాడే వేదం అన్నట్లుగా వాడు నాకు మీ సైట్ చూపించి, “అంటే నీ ఉద్దేశ్యంలో ఈనాడు వాడు తప్పు చేశాడంటావా.. “ అని ఎదురు ప్రశ్న వేస్తున్నాడు.
కాబట్టి వేడుకునేదేమిటంటే, మీరు తెలుగు భాషకి సేవ చెయ్యకపోయినా ఫరవాలేదు అంతే కాని హత్య చేసి సమాధి కట్టి.. మా పత్రిక ద్వారా తెలుగు భాషని వికృతి చేసి తెగులు భాష చేసామని చంకలు కొట్టుకుంటానంటే మౌనంగా మీ పత్రికను త్యజించడం తప్పితే ఇంకేం చెయ్యలేను.
ఆ ఆవేదనను మన్నిస్తారని ఆశిస్తాను.
